Acts 2

Lovotpot At Loroonan Kaala Saparap Limixin Nuunu

1At lara laaleng limixin me Judaia diga lok laanan silok, diga tong i do Pentikos; nedi limixin axap diga nuunu diga vot eburu ro at lara loogu. 2La soso mun diga ronga lavanga ga rupot ngan lamanman silok boro vana at laxalibet, la ga lox aumsu mo loogu digat kis to xeneng teren. 3La diga ven lavanga ngan laxao ga rem epeseves ap mo loxot diga nemen teren la gat los kis atnedi getgesara. 4Loroonan Kaala ga vubeles atnedi axap la diga lox epovo i do dina paase mi lempapaase petpes, i ngan Loroonan Kaala ga raba di min.

5Ap mo loxonaleng limixin at ne Moroa boro at lengkot axap at na lavatbung menemen digak lok go Jerusalem ti lotu saparap ne Moroa. Nedi at lubungmixin me Judaia. 6Diga ronga mo lavanga la buaang mun limixin diga rupot eburu ro ap mo loogu. Diga sangu mila nedi getgesara diga ronga i do luvuttadi vavang diga tong asu levelinga at ne Moroa mi lempapaase atdi xa. 7Diga sangu aleng la diga lok, “Na luvuttadi di paase xeretna nedi boro Galili. 8I lok kereva la nedik axap dia ronga nedi di epaase mi lempapaase axa atdik. 9Nedik na boro Patia, Midia, la Ilam; boro bok Mesopotemia, Judaia la Kapadosia, Pontas la Asia; 10Pirigia la Pampilia la boro Isip la at lengkot bok Libia saparap Sairini; la lentaba bok atdik na boro Rom. 11Lentaba bok at lubungmixin me Judaia, la lentaba atdik boro vetpes, di lok kaka mun lunuunu at limixin me Judaia; la lentaba bok atdik boro Krit la Arabia ketla nedik axap di ronga di, di paase mi lempapaase axa atdik mumu lempanga sangsangu ne Moroa ga lox i.” 12Diga lingun la diga esue minedi getgesara, “Ua lavasuun at na?”

13Ketla lentaba diga lok kalise luvuttadi vavang, la diga lok keretna, “Na luvuttadi dia vinin solo laxangkadan lolos.”

Pita Ga Vavang Ti Limixin

14La ne Pita eburu mi luvuttadi vavang diga tu kantubu at limixin axap la ni ga lok tidi xeretna, “Limixin me Judaia la nemi mo mik lok de Jerusalem, mina ronga levelinga rak; nia ana soxomus lavasuun at na lavanga rinimi. 15Na luvuttadi xopmen dina in kerekngan nemi mi doma i, mo vam i vasik konaleng maxantamak suubu. 16Ketla nai ne Moroa ga vaase asu i at levelinga at leeme vapaase alii, ne Joel.

17Moroa ga lok keretna, ‘Auret ti laaleng kavaxap at lavatbung menemen nia anaba lox i na; anaba riki asi Loroonan Kaala rak uto xantubu at limixin axap. Laxamdak mi laxaalik atnimi dinaba paase alii tempanga; luvuraau maxat atnimi dinaba silimet tangarang ka tempanga; la luvuttadi asioxo atnimi dinabam tobo teventomtobo. 18Ap mo levenaleng anaba riki asi Loroonan Kaala rak uto xantubu at lavasaxaruki rak bok, lavatlok mi lavakin; la nedi dinaba paase alii tempanga. 19Anaba lok tempanga loklok katling to vana at laxalibet la tempanga sangsangu ro xopok at lavatkangka. Lada, laxao la lakbus at lusuxa naba rupot; 20laxangking naba rem gili na ngan lamain la lagaaling naba memele ngan lada; la melemu mo laaleng silok at Leeme Silok naba rupot. 21La do tara na sing ti laasen tarak kusu ri loklok tooro, ni naba roo.” ^a

22La ne Pita ga lok bok, “Leme Israel. Mina ronga na levelinga; na ne Iesu me Nasaret ni laradi ne Moroa ga lox asilox i mi lempanga sangsangu kantubu atnimi la nemi axa miga ven pam mo lempanga ni ga lox i at lekngen ne Moroa. 23Moroa xa ga lox agagas i la gaklen pam lavanga naba ravasu, kerekngan lodoxoma axa ren; la nemi miga sev amer i xeretna, miga siam taba luvuttadi xapmek do dina vaxarem i ro vana at laxaba. 24Ketla ne Moroa ga lox arooro amlong i basinge lololos at lanmet mila kopmen goxo epovo kusu lanmet na ranga alis i. 25I lok ngan ne Devit ga paase mumu i xeretna,

‘Nia a reven Leeme Silok to melamgo rak at levenaleng axap. Ni mo ik lok at lakngak tino, kusu nia noxo marat at levenmumuat limixin di lok li i rak. 26Kuren la nia a umsu mi lomomo, la a paase momo mun. Nenia a ruuna lodoxoma voovo, 27mila nenu, ne Moroa noxo ke xepe loroonan tarak keneng at lolos at lanmet. La u noxo ke xepe Lanarong taram la labantuxu ren napso. 28Ugara lox ase vam ia mi langas ti nom lorooro ruturun. Nenu uba suxa umsu ia mi lomomo, mila nenu uk lox eburu minia.” ^b

29La ne Pita ga lok bok, “Luvutnetak mi luvurinuk, ana vaase axasep nimi mumu lurubuno avolo atdik, ne Devit. Ni ga met pam la digak mir i, la lamaaut teren mo i nemen de, ise at na laaleng. 30Neni ga leeme vapaase alii at ne Moroa, la ni gaklen pam laxakaape alii at ne Moroa rin. Moroa ga vangpe do ni naba lok ka tara at livipisik li at ne Devit kusu ni naba lox asilox i, ngan loorong silok. 31Devit ga ven pam umelamgo ri lavanga salai ne Moroa naba lox i; kuren la ni ga paase mumu laxakatu kaxat amlong at Lanarong. Ni ga lok, ‘Loroonan teren noxo nemen to at lemenemen at labarongan; la labantuxu ren noxopso.’

32Moroa ga lox aroo amlong ne Iesu basinge lanmet, la nema na maga ven lorooro amlong teren. 33Ni ga lam kaka i uto vana at laxalibet la ga vaxaxis li i ro at lixitkis orong la ne Moroa xa ga raba i mi lololos kusu ni na riki Loroonan Kaala ren tinama, kerekngan tai mo nemi mi ven i la mi ronga i. 34Mo loxot to vana xopmen na paase mumu ne Devit do ni ga urut uto vana at laxalibet; ketla ne Devit ga lok keretna,

‘Moroa ga tong i ri Leeme Silok tarak; una xis de at lakngak tino, 35se nenia aba lok li mo limixin munepen taram, i ngan loxot burubut to maxopok at luxangkedek taram.’ ^c

36Kuren la limixin axap me Israel dinaklen avukar i do na ne Iesu, no miga vaxarem i ro at laxaba, ne Moroa ga lok li i xusu neni Leeme Silok la Lanarong.”

37Mo limixin diga ronga i na, diga bulu aleng la diga lok ti ne Pita eburu mi luvuttadi vavang, “Luvutneton nama, maba lok lavanga salai?”

38Pita ga lok tidi, “Nemi getgesara mina leeng basinge leveloklok kakapmek atnimi, la mina lok kaka lesep susu at laasen at ne Iesu Karisito kusu ne Moroa naba doxoma xepe leveloklok kakapmek atnimi la nemi minaba ruuna ka na laramtaba at Loroonan Kaala. 39Moroa ga lok na lavapaase alii rinimi la livipisik li bok atnimi la tidi bok no di nemen paxalom, la tinedi axap ne Moroa naba ro xaka nedi.”

40Pita ga paase aronga di mi laxalinga solo la ni ga sing tinotno bok di xeretna, “Mina lok tatao avukat nemi xusu mi noxo suma langsangan losongsongot mo naba rupot saparap limixin kakapmek at na levenaleng.” 41Buaang atnedi diga nuunu ap mo levelinga la luvuttadi vavang diga sep susu di; lavantun larabin sangsangaun kobot (3000) limixin diga beles saparap nedi luvuttadi nuunu ap mo laaleng.

42Diga tupot eburu amisik mi luvuttadi vavang kusu rik lok ka levenanasa at ne Moroa; digak lok levengkitkis buru la levenanan buru la levesingising atdi.

Lorooro Kantubu At Limixin Nuunu

43Buaang lempanga sangsangu luvuttadi vavang diga lox i la ga lok buaang limixin diga sangu. 44Mo luvuttadi nuunu diga vot eburu amisik la diga vepes bok lempanga axap atdi xantubu atnedi. 45Diga sesep bok mi lempanga atdi la mo levempilas teren diga epes i xantubu atnedi ga epovo at levempakpakes atnedi getgesara. 46At levenaleng axap digat pot eburu amisik ngan loxonbinam tadi ro xeneng at loogu laplavang la diga anan buru leveluxa atdi ro xolonu, diga anan mo leveluxa eburu mi lumulus la lomomo keneng at lebelen di. 47Diga emi asu mi ne Moroa la limixin axap diga lok ngangao atdi. At levenaleng axap Leeme Silok gam lam abeles bok luvuttadi diga lok kaka lunuunu at laasen at ne Iesu ukeneng ap mo lexekexes atdi.